Opus 339/ 1987
Bei meinem Bemühen um freundliche Lieder
standen mir immer wieder die allzumenschlichen Erfahrungen aus meinem
sozialpädagogischen Beruf im Weg. Inventur machen und Entrümpeln war angesagt.
I hob koan Plotz meah in meim Kopf,
es liegt sovaej umanand!
Kreiz und quea und draaf und drunta,
und jedn Tog wiads nomoi bunta.
Sovaej Kruusch und sovaej Krampf!
Sovaej Fests und sovaej Dampf!
Manches is grea und manches grau,
manches dumm und manches schlau!
Manches is laut und manches schdaad,
manches is schoaf und manches fad.
Manches is trugga und manches feicht,
manches is finsta und manches leicht!
Manches is niedrig und manches heha,
manches weit und manches näha,
manches gring und manches schwaar,
manches is voi und manches laar!
Sovaej Goid und sovaej Blech!
Sovaej Glick und sovaej Pech!
Sovaej Gscheads und sovaej Guats,
sovaej Langs und sovaej Kuaz!
Manches is satt und manches gierig,
manches oafach, manches schwierig,
manches is schee und manches schaej,
manches is langsam und manches schnaej.
Manches is eckig und manches kuglad,
manches em und manches buglad,
manches guad und manches schlecht,
manches foisch und manches echt.
Sovaej Liab und sovaej Freid,
doch Gottseidank! koa Breggal Neid!
Sovaej Hoffnung, sovaej Pläne,
Esse gnua und Hähne!
Sovaej Gschpoaß liegt aaf da Laua,
manches is glatt und manches rauha,
manches is woam und manches koit,
manches is nei und manches oit.
Sovaej Leit und sovaej Gsichta,
sovaei
Tatn, sovaej Richta,
sovaej Gaude, so weng Ruah,
soweng Fiaß und sovaej Schuah!
Manches is gscheid und manches dumm,
manches kann reen, manches is schtumm,
manches is hiat und manches lind,
manches is eanst und manches schpinnt.
Manches schlofft, manches is wach,
manches is tuif und manches flach!
Manches lebt, manches is doud,
manches is schwoaz und manches rout!