edition
baam
1981
Aejtz woaße ned, mochts ma Mandal via?
Hamma aejtz d Waejd aafgoawat
oda traame grod?
Is aejtz ois beim Deife oda is ois im Himme?
Eigentle is, eigentle is
um unsa Waejd scho recht schod.
Aaf de Wolknfetzn hoggand Rengwüama, glauwe,
und wia mit Semmebresl paniad
schaut s Land aus.
Drei Maikäfa hods in Glos eigfread, mei schee!
Und in dem groußn Lo,
duat, wo imma der Berg war,
is ois nei glasiat.
Und aus de Bunka im Goatn kruicht koana meah.
s Land is koinschwoaz und vo de Leit
sehgt ma grod no Fusal, awa aa fast koi.
Da Ozean kocht a bor Insln aus und am Hauptbahnhof,
man mechts ned glaum, schteht owei noch d Arche Noah.
Doch nach Vobrenntn schtinkts duat aa ned bessa.
Mei wo sand aejtz d Wiesn, d Vogal, d Bleame?
Wo is da Woid?
Grod d Sunn scheint
hinta de schwoazn Woikn und da
Moschein und d Schtean
leichtnd wia friahra...
1980
I entsprich ned recht
dem bürgerlichn Bildungsideal,
waa i grod des woaß,
wos me intressiert hod
und ned des,
wos andre moinand, wos
i wissn meassat.
Biachl warn für mi owei
Offenbarung und nia Foitawerkzeig.
1983
Da war amoi a Baua, der is an ganzn Dog mit seim Bulldog umanandadieslt.
Kaum, dass in da Friah da Gickl kraaht hod, hod ma de Zwoa scho ghead. Zeascht
sand s mitananda um s Küahfuada gfohn, nacha ham s zamm gackad, gmaaht,
ham s Hei gwendt und hoamgfohn.
Im Winta ham s miteinanda Schnee graamt, Hoiz zong und wer woaß, wos no
ois mitananda triem ham.
Se warn zwoa Freind, wia ma s unta Leit heit e nimma findt.Manche Leit
vozaejhn, dass da Baua sein Bulldog, jedes Moi wenna bsuffa gwen is, mit in sei
Bett gnumma hod. Awa mei, d Leit schmaatznd vaej, wenn da Dog lang is. Seit
kurzm song s, dass da Bulldog manchmoi mitm neia Ladewong fremdgaang....
1985
Übaroi wo s Kout recht loahmig war, sand nachm Ackan aaf de Faejda lauta
Koutbotzn gleng. Da ham d Bauan no so guat eggn kinna - doch die Botzn sand ned
recht vaej kleana woan. Und da ma aaf Botzn schlecht ebbs obau kann, hod jeds
Dorf sein Koutbotznztreta braucht.
Da Koutbotznztreta war a wichtiga Mo. Wenn mas genau nimmt - glei no
wichtiga ois wia da Burgamoasta oda da Pfarra. Koutbotznztreta konnt aa ned a
jeda wean, grod wer recht broate Fiaß ghod hod, hod dafüa taugt.
Und waa die broatn Fiaß aa no ned glangand und zu dem Gschäft aa a
schwara Mo gheat, hod jeda Baua an Koutbotznztreta gfuadat wia sein bessan Oxn,
damida ja ned vom Fleisch gfoin is. Awa so schee hods da Koutbotznztreta aa
wieda ned ghod - an ganzn Tog aaf de Botzn umanandadadschn und dabei no ned vom
Fleisch foin - leicht sog enk, wars gwiß ned! Ja wos glaubts, wia die
Koutbotznztreta gschwitzt hamd? D Soß is er grod a so awagrunna, beim Essn und
beim Ztretn.
In da schlechtn Zeit woitnd oft magare Leit dene echtn wampatn
Koutbotznztreta d Oabat wegnehma. Se ham se a Kiam mit Faejdschtoana am Bugl
bundn, damit s a Gwicht kriagt ham - awa es war nia nix gscheids, waa es hod
owei no an de broatn Fiaß gfeit. East wia s dann d Eisnwoizn aafbroht ham, hand
Koutbotznztreta owei wenga woan. Heit sehgt ma fast goa koi mehr, eigentle
schod...!
1984
Da warn amoi zwoa narresche Kine. Waa a jeda vo de Zwoa im
Gschichtsbiachl drinn schteh woit, ham sa se an Kriag ausgmocht. Eahrane Bauan
ham s eisane Schpieß und lange Messa gem und zum Schlachtfaejd befoihn. Doch de
ham se bei dem narrischn Gschpaej ned recht auskennt, waa sa se ned ausananda
kennt hamd. Koa Wunda, waa jeda hod zwoa Augn ghod, an hungringa Bau und dahoam
an Haffa Oawat. Oiso ham sa se highockt und Broutzeit gmocht und ned vostandn,
warum eahrane Kine goa a so gschrian ham.
A Zeit draaf ham de zwoa narreschn Kine füa eahrane Bauan a gleichs
Gwandl schneidan lossn. Da oane Kine a routs Gwandl, da anda Kine a schwoaz.
Dann ham s wieda ehrane Bauan gschrian und ea des Gwand oleng lossn. Da oane
Kine hod dann gsogt: "Passts aaf ees Deppn! Ees sads die Schwoatzn! Waa
ees sads ees und de andan sand de andan! De Routn bedrohn unsa Land und woin
enk ois wegganehma! Enkane Hüttn und s Koan, enkane Weiba, enkane Kinda und
enkane Hehna und Sai, und Kiah sowieso!"
Und da anda Kine hod gsagt: "Luusts zua, ees Bauanschäl! Mia sand
de Routn und gfeit hods, wenn de Schwoatzn kemmand! Alle daschlongs uns, wenn
ma s mia ned voaher daschlongd!"
Nacha ham de zwoa narrischn Kine ehrane Bauan wieda aaf s
Schlachtfaejd gschickt und desmoi hods highaut mit aehram Kriag. Die Bauan wos
übrebliem sand, ham aaf de andan an sechan Zoan ghod, dasse eahrane Kinda aa
wieda ogmurckst ham und dene eahrane Kinda aa.
Und die zwoa narreschn Kine sand ins Gschichtsbiachl eikemma. Vo de
Bauan schteht grod drinn, dass de oan a schwoaz Gwandl oghod ham und de andan a
routs.
1983
Du sogst naa und i sog ja,
du sagst om und i sog unt,
du sogst voan und i sog hint,
oana schpinnt
Du sagst koit und i sog woam,
du sagst reich und i sog oam,
du sogst schee und i sog waejd
und oizwoa hamma koa Gaejd.
1980
Unsane Realpolitika sand total pragmatisch
und trangt eahran Kopf
praktisch nia üba de Woikn.
Se schaun aaf d Waejd vo wos so schtehngand, und des heha is a Biabeng
im Festzaejt.
Eahra Weitsicht is dementsprechnd.
Da awa heit eh ois vo Sachzwänge gschteiad wiad,
haejfad a so a Üwablick,
sang s, eh ned vaej.
Logisch, dass grod vo Aejfe bis Mittag dengand
und eh klar, dass eahrane Ziele
grod sechane sand, die ma herzoing kann.
Realpolitika ham koi Utopien
und eahrane Werke kann ma oizamm fotografian. Awa wia soit mas an sunst
in d Lokalzeitung eibringa...?
1984
Es wiad amoi a Zeit kemma, wo a jeda zua
Gwissnsprüafung muaß, wenna zum Barras geh mecht.
Und i sag enk, es wiad ned leicht sei,
dass ma da anerkannt wiad.
Da wiad ma ois erstes gfrogt wean, ob ma se
Christ nennt. Wenn ja, wean s oam
d Bergpredigt in d Händ drugga
und glei wieda hoamschigga.
De andan wean gfrogt wean, ob ma übahaupt
fähig is, ohne Skrupl zum parian
und – grod waa s ebba oschofft - andare Leit abzumschlachtn.
Ob ma übahaupt fähig is
Granatn und Raketn abzumschuißn,
wenn ma genau woaß, dass oisen zreissn:
Feind und Freind, Fraun und Kinda,
und vo dera scheena Waejd am End nix mehr übrig bleibt.
Es wird amoi a Zeit kemma
wo jeda zua Gwissnsprüafung muaß,
wenna Soidat wean mecht.
Und i sag enk: Es wiad ned leicht sei,
dass ma da durchkimmt.
I mecht manchmoi
phlegmatisch sei
1983
I mecht manchmoi phlegmatisch sei
dann waar ma oisen wuascht.
Dann lochade wenn andre pläan
und häd hechsnts meah Duascht.
Sie is a modeana
Zentralheizungsbootsch
1985
Sie is a modeana Zentralheizunngsbootsch
s ganz Heisl muaß woam sei bis untas Dach.
Egal, wos vobrennt wiad
sie frogt nix danach.
Sie mog s woame Wossa no
liawa ois mi.
Obwoi i ganz gwiß ned zwieda bi.
I mogs goa ned wissen
aaf wos daad liawa vozichtn...
1985
Wennts ees des Wort "Hoamat" sogts
schnüats ma ebbs im Bauch,
waa Hoamat is ned jodln
grod
und grod volongna Brauch!
Mei Hoamat is ned blaukariert
sondan mehr und mehr teerschwoatz
und bei dem trüabn Resümee
bine ned alloans!
So weit habtes fast scho bracht,
dass "boarisch" schteht für gschead!
Wos hob me i für enk scho gschamt
- womit hamma enk vodeat?
Hoamat is a guades Gfaejh,
drum gehts aa damit hausian.
Doch wenne sehg, wos sonst so treibts,
hawe Angst, dass ma s voliern...
Wos bauts denn da in Wackersdoaf?
Is enk d Hoamat so weng wert?
s Erdinga Moos und s Altmühltal
doch aa zua Hoamat gheat!
Und wenne üba d Fluren geh
dann sehge nirgands Baam.
Wo handan d Roi, wo handan d Vegl?
s is wia in am schlimma Traam.
s modernste Land Europas woits
in Bayan installian.
Des is a Irrweg, glaubts mas doch!
Mia wean oizamm erfrian!
1982
Heit waej enk vozaejhn, wia re saejmois im Schlaraffnland gwen bin.
Oiso, ois ersts hod me die Gaude duat überrascht! Aaf dene eahrane Schtraßn
wualts grod so vo eisane Maschinen, in dene d Leit umanandafahrn. Jeda hods
nedig und jedm pressierts. Sogar am Himme om fluingd eisane Vögl, in dene Leit
drinn hockand!
Wos des für a Gaude und für a Gschtang is, kinnts enk woi denga - de
Leit durt scheint des awa ned weida zum schtöan.
Wennts enk eibaejts, dass wenigstns aaf d Nacht a Ruah waar, habts enk
taischt! Waa de Leit im Schlaraffnland schlofand ned ebba wenns finsta is.
Übaroi gibts Liachta, die wos eahrane Haisa und Straßn aa in da Nacht taghaej
beleichtnd. Die hoibate Nacht hockand d Leit voa flimmade Baejtlkistn. Dazua
saffans ebbs, wos recht damesch mocht. Awa no ned gnua- dabei steggans kloane,
mit Bladl gfaejde Papiaroina ins Moi - zentn s o und schnaufand doch glatt den
gschtungan Rauch ei!
Ins Bett gehngan s erscht schpät in da Nacht, wenn in da Baejtlkistn koi
Baejtl mehr kemmand. Dafür schloffand s dann oft weit in Tog eine.
D Leit im Schlaraffnland wohnand in grouße Haisa - da gibts Sachan, sog
enk! Neamad braucht duat mehr s Wossa vom Brunn hoin - da druggst aaf an Hewe -
und scho rinnts s Wossa, woam oda koit, wias das grod megst, aus am glänzadn
Roah!
Oda moints, dass duat ebba hoizwaaglt, hoizhaut und se schindt? Wer s
woam ham mog - draht an kloana Knopf - und scho wiads woam im Haus! Koa Feia,
koa Dreeg, wia a Zauwarei!
Leida ham s Essn in Eisnbiggsn und Schachtln vosteggt. Wenn s ned übaroi
so scheene Baejtl draufpiggt hättn, wissat ma goa ned wos drin is! Mia, wo ma
gweht sand ois frisch vo de Baam awazumzupfa, oda aus da Erd zum grom, mia
kannt ma uns an des Biggsnzeig woi nia gwehna! Übahaupts, wos die des ganze
Johr füa a Zeig einefressnd! Mia gawat ma a so a vokochts, vozuckats und
vosoizns Glump ned amoi an Hund - aus Angst, dass eahm d Hoor ausgahngadnd!
Moints, de essadn d Sachan a so wias da Herrgod gschaffn hod? Des is er
ned fein gnua, da meassnd east se no a weng umananda mankln!
Dafür hockands dauand beim Dokta! Krankheitn hams, die kemma mia goa
ned. Ganze Biachl gibts in dene nix andas ois ehra Wehtum drinnschteht. s
braucht enk awa ned wundan - jeda zaht a drum Wampn umanand und mancha sehgt
vor lauta Schpeck fast nimma vo de Aung aus!
Die Leit duat oabatnd aa ned wia mia im Woid und aaf de Faejda, owa
oabatn meassn s aa. Die oan in grouße Halln an laude Maschinen, die andan
hockand in kloane Kammal und gaglnd an ganzn Tog aaf Papier aaffe. Wieda andane
schnein dene Leit an Bauch aaf oda trongt an ganzn Tog a Gummiwuutzal schpazian...!
Manchmoi sand die Leit mit eahrane Fahrmaschinen schtundnlang untawegs,
bis an eahran Oabatsplotz hikemmand. Duat bauns dann mit ana Maschin a andane
Maschin - und mit dem Gaejd wos dafür kriangt - kaffandasse wieda a neie
Fahrmaschin. Wenns a weng schpekuliern daadnd und daadnd dahoam bleim, kanntn
se se den ganzn Aufwand schpoan - waa dann brauchadns die Maschin goa ned. Oda
brauch ma mia ebba a sechane Maschin?
Des is ja des narrische - die Leit im Schlaraffnland schindn se für
Sachan, die ma mia übahaupts ned brauchand - Baejtlkistn, Fahrmaschin,
Rauchroina und lauta sechane Kraampf! Wiares amoi draaf ogred han, hams gsogt,
i kam hoid wer woaß wo her und wissat ned wos Fortschritt is!
Wos mit eahram Fortschritt dauand z weis ham, hawe nia ned voschtandn!
Moints, die kanntn se amoi in Ruah hignogga und se übas Togwerk gfrei? Ois
wenns Wessn im Osch hättnd, ja ois wenn da Deife hinta eah her waar, - ois
wenns Angst hättnd ebbs zum vosaama - an ganzn Tog und de hoiwade Nacht
treibtses umananda!
Wenns hoam kemmand vo eahrana dameschn Oabat, wissns nimma wos doa soin
! Awa wos soit ma denn aa doa in so am Wundahaus? Drum fangans hoid s Spinna o:
D Weiba putznd eahra Wohnung, obwois goa ned dreggat is.
D Maana poliand eahra Fahrmaschin, dassd moinst mit iah wadns voheirat!
Manche rennand wia bled hinta aafblosne Ledakugln her oda schaun zua,
wia andane dahinta her rennand. Dabei schreins und fetzns ois wenns ogschtocha
weradnd!
Wieda andane bindn se im Winta Hoizbredl an d Fiaß und rutschnd tagelang
voschneite Berg oi. Und dann gibts no oi - de haun se mit dicke Handschuah
solang ins Gsicht bis oana umfoit, und de ganz andan vosuachand wie Noan mit am
Schtegga a kloane Kugl in a kloans Loch einezumschtessn...!
I sags enk - es is kaum zum glaum, wos se im Schlaraffnland d Leit ois
eifoin lossnd - nur um eahra Zeit tout zum schlong! Und gschpannand ned, dass
Zeit des wertvoiste is wos ma ham!
1985
Da Schoon ghead uns alln,
da Gwinn der ghaed grod eah!
1985
A Katz, de fangt se Vegl,
fangt Mais und manchmoi Fluing,
wer sagt, sie fressad Bladl,
der wead amend woi luing.
1985
"Geh Opa, vozaejh uns
no amoi wias friahra gwen is!"
"Naa Kinda, hobs enks
eh scho so oft vozaejht..!"
"Oamoi noch, Opa! Mia
hea mas hoid so gean..!"
"Ees hoits dennast o
wia d Schtaisitza! Na ja, hockts enk her.., wos woitsan hean?"
"Vom weißn Schnee, Opa, vom Frühjohr und dene fluigadn
Viecha..!"
"Ja mei, da Schnee! Friahra is da Schnee weiß gwen. So weiß wia
hoid grod da Schnee war... Wenn d Sunn draafgscheint hod, hoda glitzad, dassd
fast ned schau kinna host. Kinda ham Schneemaana baut und mit Schneeboin
gwoafa.."
"Hod ma damois den Schnee wirkle oglanga kinna? Is ma da ned glei
krank woan davo?"
"Frale hod ma den Schnee oglanga kinna, Miche. Koit wara hoid, owa
sunst hod da nix gfeiht. Kinda ham se aa schneewen loßn, des hoißt, se ham se
tratzt und se dann anSchnee ins Gsicht eingriem."
"Ins Gsicht? Des glaube dia ned Opa, da daad da ja d Nosn
weggafoin..!
"Heit scho, awa damois host grod a routs Gsicht kriagt, waara so
koit gwen is."
"Und wia war des im Frühjohr mit de fliugadn Viecha?"
"Mei Maral, des war schee, wenns Frühjohr kemma is! Vo weit her
sand d Vegl zruckkemma, vo Afrika und wer woaß wo her. D Vögl, des warn so
Viecha, mit Fedan statt Hoor und Flügl wia Flugzeig. Die ham gsunga und pfiffa,
dass grad a Freid gwen is. Dann ham se se Nesta baut, die oan ins Grss, die
andan aaf Baam aaffe. In d Nesta hams dann Oia eineglegt, und aus de Oia sand
kloane Vegal ausgschloffa und dann ..., wos? Wos Baama sand? Dass amoi Leit
gibt, die wos ned amoi Baama kennand, häd se friahras aa neamand denkt! Baama
hods so vaej gebn, dass ma se zwischen eah volaffa hod kinna!
Oiso, Baama! Baama warn aus Hoiz und sand aus da Erd gwochsn. Oft warns
so houh wia a Haus, ja oft no heha! Jeda Baam hod hundat Ast ghod und aus dene
sand tausnd Zweigal gwochsn und aus dene hundattausnd Bladl. In de Bladl ham d
Baama d Sunn eigfongt und drum sand s gwochsn...
An gwisse Baam sand siaße Früchte gwochsn: Epfe, Bian, Keasch, Zwetschgn
und wias oizamm ghoißn ham! Mei warn die guat! Wenne grod drodenk, lafft ma s
Wossa im Moi zamm...!"
"Und des is ois aus da dreckinga Ead gwochsn? Einfach a so?"
"Einfach a so! Mei d Erd war ja friahra aa ned grod a so a touda
Dreeg wia heit, d Erd hod glebt! Da ham lauta kloane Viechal drinn gwohnt.
Im Frühjahr ham d Leit Samen in d Ead gschteckt und aus dene is a Gmias
gwochsn: Kraut und Ruam, Eapfe und Zwiefe, oda a Koan, und da draus hod ma dann
a Brout bacha und Brout war ziemle des wichtigste im Lem. Mei, des hod
gschmeckt, da hod ma ebbs zum Beißn ghod.."
"War des bessa, wia des wos ma heit essn?"
"Maral, des kannst goa ned vogleicha! Unsa heidiga Fraß und des
greißliche Tablettnglump, des wos nach goa nix schmeckt häd friahra neamad
freiwille gessn.."
"Stimmt des wirkle, Opa, daß d Leit friahra ohne Gasmaskn
umanandagrennt sand? Is eah da ned schlecht woan, hod ma da ned glei schpeim
meassn..?"
"O mei Maral, s Schnaufa! Mei, han i gean gschnauft! In da Friah,
wenne s Fensta aafgmocht han, hane owei a paar Moi ganz tuif gschnauft, zeascht
ausgschnauft und dann eigschnauft, bis nix mehr einepasst hod in mei Lung..! s
Schnaufa, des war wia s Tringa, nua noch vaej scheena! A sechane Wuat kriage,
wenne drodenk, wos uns ois gschtoihn ham! Die Maschinendeppn, die damischn! Ois
wos schee war und nix kost hod, hams higmocht! Dafüa hamma tausnd Plastiktrimma
kriagt und mit hundat Maschinen kimma uns heit elektrisch zum Noan hoitn! Awa
wenn uns der Plunda s Lem ja so erleichtat! I sag enk: den ganzn Dreeg daade
eitauschn, nur für oamoi a frische Luft schnaufa kinna wia friahra, für oan
Voglgsang, oan Baam, ja für oan Opfe!"
"Geh Opa, reg de ned wieda so stoak aaf, waast dann wieda pläan
muaßt..!"
"Ach, waas woahr is!
Ees kennts d Waejd ja ned andast..., drum is a goa ned guat, dass enk i vo
friahrsa vozaejh! Andraseits, wissn soit ses scho, wias amoi gwen is,
waa in da Schui lernans enk eh grod lauta Bledsinn!
"Und wia war des mitm Kindamocha? Opa, des kannte mia owei wieda
ohean!"
"Ees Ganggal! Eigentlich sads dafüa ja no vaej z jung. Awa wer
woaß, am End bin i moang scho z oit zum Vozaejhn! Mei s Kindamocha! Dass des
amoi aus da Mode kimmt, häd se friahra a neamad denkt! Daß d Kinda amoi in de
Reagenzglasl zammgmischt wean, is ja a ausgmochte Sauarei, ja die allagreßte
Sauarei! Friahra ham se a Mannsbaejd und a Weiwaleit, wennasse meng ham,
zammdo, hamse druckt und gschtreichlt, na ja, und hi und do hams dann Kinda
gmocht! Wia des ganga is? Ois brauchts aa ned wissn! Da hod ma friahra ned
drüwa gred und heit braucht ma da aa ned drüwa reen, da is no aa jeda saejwa
draafkemma! Und aejtz moge nimma blewan, des regt me ois zfest aaf!"
1985
An s Haus, da ghead a
Schupfa,
an d Schupfa ghead a Schipfal,
an s Schipfal ghead a
Hosnschtoi,
woaßt quase ois i-Tipfal!
So ham s bei uns im Woid drinn baut
und so war s a vernünfte,
doch heit baun s nachm Katalog
da Gscheida wia da Dümmste!
Asbest am Dach und an de Wänd
oda Plastikplattn,
a Haustüa aus Aluminium
und nirgands mehr a Schattn,
denn im Goatn hod koa Baam meah Plotz,
geschweige denn a Schupfa,
und vo de scheen Zierschdauan
kannst nimma awazupfa.
Drinn im Haus, da legst de nieda,
schauts aa genauso aus,
da Ofa und de oitn Möwe
lieng am Schperrmüll draußt vorm Haus.
Die obligate Einbauküch,
schee rustikal furniat,
ois dritte Haut, wia im Proschpekt,
die moderne Hausfrau ziat.
1981
Wos haejfand denn mia
die haffa Sachan
die i mia heit leistn kann
- wenne s Wossa nimma tringa kann,
wenn s Essn vogift is,
wenn d Luft schwanga is vor lauta Chemie,
und wenne weng dem schtändinga Läam
no narresch wia?
Wos haejfand denn mia
die scheenstn Schtraßn,
wenns des, wo s hifüahn, himochand?
Und hod des wos mit Sichaheit zdoa
wenn oana, wia a
Saejbstmöada,
aaf am Puivafassl hockt
und sich desweng
koana ogreifa traut?
1982
Übaleg das, wos d higheast!
Wos deine Interessn sand
und wer die vertritt!
Ob die oan wirkle deine Freind sand,
waas des Auto fohn,
des du aa gean fohn daadst,
und ob eahra Freiheit
aa wirkle dei Freiheit is,
und ob die Schprüch, die dia aa scho so leicht
üba die Lippn kemmand,
wirkle deine Schprüch sa kinnand,
oda obs d de damit ned grod saejba voaschst.
Übaleg das, wos d higheast!
Ob der Schpeeg, aaf den di so glust,
ned grod da Schpeeg is in
ana Mausfoin,
und ob eahra "way of
life"
wirkle da deine sei kann
und ob eahra Gschroa vo Sicherheit
aa dei Sicherheit erheht
oda obs d de ned bessa andast
vosichan soitatst...
1982
Es foit owa,
wos owa foin kann,
aaf Daua om bliem
is no neamd und nix.
s is ois vogängle,
und s is aa guat so,
waa lebenslängle
is meist sachgnua.
Und wos im Kreis geht
is ned voloan,
und ohne Liacht
koa Schottn foit.
1981
Grod waas d amoi a so gsogt host,
drum sogst heit aa no a so,
obwoihs das heit längst bessa woaßt,
sogst owei no a so.
Da gaangs da, host gsogt, ums Prinzip,
du waast grod konsequent,
und übahaupt hättst das vo Haus aus
aa nia andas kennt.
Und so wia du bist, gibts an Haffa,
dia ham se gweht an s
Raffa,
Saffa und an s Kaffa.
Und - solang da ned
noß in d Schuah eirinnt,
bleibst d blind, blind, blind...
Wenne zu am Hackstock red,
häds aa ned mehr Weat,
und waa so vaej sand wia du
- laafft so vaej vokeaht.
1982
Wia a Vogl, tuif im Wossa unta Fisch,
kimmama via, wenne sitz bei enk am Tisch,
wia a Funkn in am See,
wia a Bleame tuif im Schnee...
1983
I glaub, du lebst in ana andan Waejd.
Oda wia gaabs an des sunst,
daß ma uns mia zwoa
ned amoi gscheid untahoitn kinnand?
Deine Traam sand ned meine Traam
und üba mei Angst
muaßt du grod locha.
Des wos mia wichte is
intressiert de glei goa ned,
und dei neis Auto
is mia so wuascht wia nua ebbs...
Tieffliega, die mi hoiwat umbringand
und die i am liaban mit Hehnadreeg
awaschuißn daad,
vobreiten für die an "Sound of freedom"
und des gschpritzde Fleisch,
voa dem mia a so graust,
schmeckt dia am allabessan!
Es ist fast ned zum glaum:
mei Waejd is vogift,
voia Hunga, Unrecht und Bombn
und mia pfeif ma aafn Lo.
Dei Waejd is ganz andas.
Die meine, moine, draht se um d Sunn
und die deine um Bayan oda Sechzge...
1980
Da Schtoa is so schwaar
und d Leit sand bequem,
doch mia is des wuascht,
i wead den Schtoa hem!
Da Schtoa is vaej z hiat,
zum zbeißn mit Zähnt,
doch wenne frech sing,
no z schpringda ament!
Da Schtoa, sang s, waar z grouß,
ja vaej gressa ois i,
und dennoch, weads sehng,
i mochn no hi!
1978
Awa oans, awa oans woaße
gwiß:
solang no a Lem in mia is,
weade ned staadsa
und enk applaudian,
es sei denn ees
ambutierats ma s Hian!
Waa enk muaß ma bremsn
und klopfa am Huat!
Do is ma wenigsns a weng
für ebbs guat!
Waa sunst weads no gfeida,
sads eh scho gfeid gnua,
enk weade no geistan,
voa mia habts koa Ruah!
1988
Aejtz bine jahrelang owei nach obn ganga
Und manchmoi hob i denkt, i kaannt die Spitz dalanga.
Doch is ma d Luft aejtz z dinn woan und fruisn duat me aa
Und üwaroi is Newe, i schnauf me aa so schwar.
Aejtz bine jahrelang, brav nach obn ganga
Wia da gressa Noa, woit irgendwos dalonga.
Doch is ma d Luft aejtz z dinn woan und fruisn duat me aa
Meine Fuaßsoin brennand und i schnauf me aa so schwaar.
I war oft in da Zeitung und im Radio
Und an so vaej Ruhm gweht ma se schnaej dro.
Und d Leit ham gsaogt: „Schau hi! Is des ned da Saej?“
Und so hamms manchmoi gafft, doch des is ned wos i waej.
Und Gsaejschaft do herom is ned so wia ma moint
I hob an Haffa troffa, die innalich dafoin.
Nach aussn, ja da glänzns, do trongs a kaffte Haut.
Vo funierte Leit hod ma scho owei graut.